O BNG reclamará no parlamento a delimitación definitiva do camiño de inverno

A deputada do BNG no Parlamento de Galiza, Maria G. Albert defenderá no Parlamento Galego a reclamación da formación nacionalista para que a Xunta de Galiza incoe o procedemento de delimitación do Camiño de Inverno, tal e como esixe a lei de Patrimonio Cultural de Galiza.

Ao tempo, o BNG reclama que se modifique o Plan Básico Autonómico en todos os puntos nos que xurdan discordancias entre o trazado inicialmente previsto e o definido na delimitación definitiva. A deputada valdeorresa presenta esta iniciativa tras comprobar a problemática xurdida en distintos concellos atravesados polo Camiño de Inverno a Compostela, nos que a Xunta de Galiza ten denegado subvencións solicitadas por varios particulares ao abeiro do “Programa de Fomento da Rexeneración e a Renovación Urbana e Rural do Plan de Vivendas 18-21”.

Así, en concellos como O Barco de Valdeorras, Vilamartín de Valdeorras, A Rúa o ámbito das actuacións limítase exclusivamente ao trazado do camiño, mais ao non existiren unha delimitación oficial do trazado o Instituto Galego de Vivenda e Solo aplica o artigo 8 do Decreto 83/2018, do 26 de xullo, polo que se aproba o Plan básico autonómico de Galiza (DOG núm. 162, do 27 de agosto de 2018). Un Plan Básico que establece a inexistencia dun trazado definitivo ao longo dos concellos da nosa comarca.

No caso do Concello do Barco, que exemplifica moi ben esta problemática, no seu tramo conflitivo, o plano do plan básico autonómico establece que o camiño de Inverno transcorre pola Avenida Manuel Quiroga, continúa pola Avenida Marcelino Suárez, Avenida Conde Fenosa, xira na rúa Castelao para continuar pola Avenida Eulogio Fernández. Por conseguinte, este trazado non pasa pola zona vella do Barco, indo en contra do que as evidencias históricas, nomenclatura das rúas, etc. sinalarían como o orixinal trazado do camiño de inverno.

Cabe sinalar que a Consellería de Cultura e Turismo proxectou e financiou a mellora da sinalización do Camiño de Inverno en todas as comarcas galegas do trazado e, de novo exemplificando no Barco de Valdeorras, concedeu subvencións ao propio Concello, nese caso si, que o trazado do camiño de Inverno pasa pola zona vella do Barco (rúas San Roque e rúa Real). Existe, por tanto, unha clara incongruencia lexislativa entre a sinalización efectiva do Camiño de Inverno e o trazado definido na documentación gráfica do Plan Básico Autonómico.

Sen embargo, e volvendo ao caso do Barco de Valdeorras, por moito que a Consellería de Cultura subvencione a sinalización do Camiño de Inverno polo casco vello e o propio concello emita certificados afirmando que o camiño de Santiago pasa polas Rúas San Roque e Real, non suplen o feito de que a normativa aplicábel -isto é, o Plan Básico Autonómico- indique outro trazado do camiño de Santiago ao seu paso polo concello do Barco de Valdeorras, problema que se repite noutros termos municipais do mesmo trazado do Camiño de Santiago.

É por todos estes motivos que o BNG entende como urxente afrontar a delimitación definitiva do Camiño para avanzar no seu desenvolvemento e evitar este e outros conflitos que se están aa evidenciar en distintos puntos da comarca polas distintas variantes que se pretenden consolidar de xeito local.